Ish-politikani i SVP-së mbahet 15 muaj në paraburgim, i dyshuar për veprime seksuale me fëmijë

Ish-këshilltari SVP-së në Parlamentin e Kantonit të Aargaut duhet të mbahet në paraburgim për një vit e tre muaj. Shkak: dyshimet për akte seksuale me fëmijë

Në shtator të vitit 2023 qe arrestuar një parlamentar kantonal i SVP-së. Arsyeja: Dyshimi për akte seksuale me fëmijë. Personit në fjalë i ishte caktuar masa e paraburgimit për tre muaj. Më pas, në dhjetor, paraburgimi i ishte zgjatur edhe për gjashtë muaj të tjerë, transmeton albinfo.ch. Tani ai duhet të qëndrojë në paraburgim edhe më gjatë, përkatësisht edhe gjashtë muajt vijues, siç ka konfirmuar prokuroria publike e Aargaut me kërkesë të SRF.

Një paraburgim prej një viti e tre muajsh është në rastin më të mirë, diçka e pazakontë, por në këtë rast është proporcional, thotë Adrian Schuler, zëdhënës i zyrës së Prokurorisë Publike të Aargaut: “Është e rëndësishme që dënimi i pritshëm të mos e kalojë kohëzgjatjen e paraburgimit. Dhe kjo nuk është duke ndodhur në këtë rast”.

Për të mbajtur një të dyshuar në paraburgim për një periudhë më të gjatë kohore, duhet të ketë dyshim të fortë për ekzistimin e një krimi. Ekziston gjithashtu, për shembull, rreziku i arratisjes, rreziku që provat të shkatërrohen ose të ndikohen dëshmitarët. Kjo do të thotë se prokuroria publike e Aargaut pret një dënim dukshëm më të lartë se një vit, përndryshe nuk do ta mbanin atë  kaq gjatë në burg, përcjell albinfo.ch.

Njerëzit në paraburgim lejohen të bëjnë telefonata, të pranojnë vizitorë ose të shkruajnë letra. Megjithatë, të gjitha format e komunikimit janë të kontrolluara, sipas zyrës së prokurorit publik Aargau.

Parlamentari kishte dhënë dorëheqjen nga Parlamenti kantonal pas arrestimit të tij. Nën presionin e SVP-së së Aargaut, ai gjithashtu ishte detyruar të jepte dorëheqjen edhe nga partia. Politikani në fjalë ishte anëtar i komisionit të drejtësisë dhe ishte anëtar i bordit kantonal të SVP për Kantonin Aargau.

Për të burgosurin vlen prezumimi i pafajësisë. Nuk është e qartë se kur dhe nëse do të zhvillohet një proces gjyqësor kundër tij.

 

---