Ministri gjerman i Mbrojtjes: Duam ta bëjmë të qartë se Kosova ka mbështetje ushtarake

Foto sc FB

Ministri i Mbrojtjes së Gjermanisë, Boris Pistorius, pas takimit që ka zhvilluar me presidenten e Kosovës, Vjosa Osmani, në një konferencë për media ka deklaruar se varësisht situatës në Kosovë, ata do të forcojnë edhe më tej kontigjentet gjermane.

“Ne angazhohemi edhe më tej, kontigjentet janë forcuar, varësisht nga situata dhe zhvillimet, ne do të vlerësojmë situatën dhe ne bashkë me KFOR-in do të marrim përsipër, është përkushtim yni ndaj Kosovës. Duam të bëjmë të qartë se ka mbështetje ushtarake”, ka thënë ai, transmeton albinfo.ch.

Ai ka deklaruar se sa i përket çështjes së ndalimit të dinarit serb, kjo duhet të bëhet në mënyrë të përshtatshme.

“Ne jemi të vetëdijshëm se Kosova ka të drejtë për të zbatuar ligjshmërinë e saj, por në deeskalim bëjnë pjesë edhe masat legjitime sa i përket vendosjes së Euros si valutë të vetme. Pra, kjo duhet të komunikohet në mënyrë të përshtatshme. Këto janë garancionet për siguri dhe këto bëjnë pjesë në dialog”, ka shtuar tutje ai.