Pal Lekaj dënohet me 3 vjet e tetë muaj burg për 53 milionëshin

Bëhet e ditur se ish-ministri i Infrastrukturës, njëherësh deputet i Kuvendit të Kosovës, Pal Lekaj, është dënuar me 3 vjet e tetë muaj burgim efektiv në lidhje me pagesën prej 53 milionë eurove që Qeveria e Kosovës i kishte paguar “Bechtel-Enkës” për zgjatjen e afatit të përfundimit të punimeve në autostradën ‘Arbën Xhaferi’, përcjell albinfo.ch.

Lekajt i është shqiptuar edhe dënim plotësues, ku i ndalohet ushtrimi i funksionit publik në administratë publike për 3 vjet e gjashtë muaj.

Ndërkohë, ish-sekretari i Ministrisë, Nebih Shatri, dënohet me një vit e tetë muaj, drejtori i Prokurimit, Besim Tahiri, me një vit e tetë muaj burgim dhe këshilltari Eset Berisha me 3 vjet e tre muaj.

Prokuroria Speciale më 4 shkurt të vitit 2022 kishte ngritur aktakuzë ndaj ish-ministrit të Infrastrukturës, Pal Lekaj, këshilltarit të tij politik, Eset Berisha dhe Sekretarit të Përgjithshëm të Ministrisë së Infrastrukturës, Nebih Shatri dhe Besim Tahirit, lidhur me ekzekutimin e 53 milionë eurove për kompaninë “Bechtel-Enkës”, e cila ishte kontraktuar për ta ndërtuar autostradën “Arbën Xhaferi”.