Gjermania i kërkon Kosovës të shtyjë heqjen e dinarit

Foto ilustrim @unsplash

Qeveria e Gjermanisë i ka kërkuar Kosovës të shtyjë planet për të zbatuar euron si monedhën e saj të vetme, mes shqetësimeve se masa mund të përkeqësojë tensionet etnike, duke ndërprerë qasjen e parave të gatshme për serbët etnikë në veri të vendit, transmeton albinfo.ch.

“Ne i bëjmë thirrje fuqishëm Kosovës që të shtyjë datën e hyrjes në fuqi derisa të gjendet një zgjidhje e pranueshme”, ka thënë në Berlin para gazetarëve Christiane Hoffmann, zëvendës zëdhënëse e qeverisë.

Sipas saj, çështja është një vendim sovran i Kosovës, teksa Hoffmann e quajti këtë lëvizje një “hap të rëndësishëm me pasoja të gjera”, që kërkon më shumë kohë dhe përgatitje, shkruan Bloomberg.

Ajo gjithashtu i bëri thirrje Kosovës dhe Serbisë që, përkundër disa përparimeve të fundit, “tash duhet të ndërmerren hapa të mëtejshëm” në dialogun e normalizimit midis dy vendeve të udhëhequr nga Bashkimi Evropian.

“Bëhet fjalë për një të ardhme të përbashkët, paqësore për qytetarët e Kosovës dhe Serbisë. Të dyja vendet duan të anëtarësohen në Bashkimin Evropian dhe qeveria federale ka interes që kjo të ndodhë. Nuk ka rrugë tjetër për të përfunduar rrugën e BE-së si për Kosovën, ashtu edhe për Serbinë”, tha Hoffmann.