Hoteli i konfiskuar në Vlorë nga autoritetet e Shqipërisë, kthehet në vend trajnimi për Policinë e Kosovës

Ministri i Brendshëm i Shqipërisë, Taulant Balla, ka njoftuar se këtë të martën është marrë vendimi lidhur me pasuritë e konfiskuara në luftën kundër krimit dhe korrupsionit.

Sipas tij, këto pasuri të vendosen në përdorim të institucioneve shtetërore.

Ai bashkë me homologun e tij kosovar, Xhelal Sveçla, kanë shkuar në Vlorë, ku pritet që një ndërtesë e konfiskuar të lëshohet si shtëpi e madhe pushimi dhe trajnimi për forcat e policisë së të dyja vendeve.

“Kemi marrë vendimin që pasuritë e konfiskuara në luftën kundër krimit dhe korrupsionit të vendosen në përdorim të institucioneve shtetërore. Bashkë me ministrin e Brendshëm të Kosovës, Xhelal Sveçla, ishim në Vlorë, ku shumë shpejt do të kemi një shtëpi të madhe pushimi dhe trajnimi për forcat e policisë”, ka shkruar Balla.