Shqipëria sot feston 111-vjetorin e Pavarësisë

Shqipëria feston sot 111-vjetorin e Pavarësisë dhe krijimit të shtetit. Ismail Qemali, në vitin 1912, ngriti në Vlorë flamurin dhe shpalli Shqipërinë shtet të pavarur, përcjell albinfo.ch.

Me rastin e Ditës së Flamurit, në Tiranë do të organizohet parada e shqiptarëve, ku do të mblidhen shqiptarë nga të gjitha trojet si dhe 150 ansamble popullore.

Rreth 5 mijë persona do të jenë pjesë e festimeve. Parada do të nisë nga sheshi “Nënë Tereza” dhe do të përfundojë në sheshin “Skënderbej”. Parada do të zgjasë 2-3 orë dhe në përfundim do të bëhet ngritje simbolike e flamurit shqiptar.

Ndërsa në mbrëmje do të mbahet Festivali i Gjirokastrës në sheshin “Skënderbej”.

Festimet do të vijojnë edhe një ditë më pas, më 29 Nëntor, pasi do të jetë edhe “Nata e Bardhë” e kthyer në traditë me koncertin festiv.

111-vjetori i Pavarësisë së vendit do të mbledhë për herë të parë pas shumë vitesh shqiptarë dhe personalitete nga çdo trevë shqipfolëse dhe diaspora e largët.