Ndeshja Kosovë – Rumani u besohet gjyqtarëve francezë

Francezët do të ndajnë drejtësinë në ndeshjen Rumania-Kosova

 

UEFA ka bërë të ditur se në ndeshjen Rumani-Kosovë drejtësinë do ta ndajnë gjyqtarët francezë, përcjell albinfo.ch.

Shtëpia evropiane e futbollit njoftoi se gjyqtar kryesor do të jetë Willy Delajod, ndërkaq Erwan Finjean dhe Philippe Jeanne do të jenë asistentët e tij.

Thomas Leonard do të jetë në rolin e gjyqtarit të katërt, ndërkaq në dhomën e VAR-it do të jenë Benoit Millot dhe Stephanie Frappart.

Loja Rumani-Kosovë luhet në stadiumin “National Arena” të Bukureshtit dhe është e vlefshme për kualifikimin në Kampionatin Evropian “EURO 2024” që do të mbahet në Gjermani.

Me fitore eventuale ndaj rumunëve, ekipi i menaxhuar nga Primozh Gliha do të rriste gjasat për një vend në evropian.

Ndeshja i takon raundit të gjashtë në Grupin I.

Pas pesë ndeshjeve të para, Rumania ka mbledhur nëntë pikë dhe është e dyta në renditje, kurse Kosova është e pesta me katër pikë.

“Dardanët” ishin takuar me rumunët në qershor të këtij viti. Ndeshja e zhvilluar në “Fadil Vokrri” ishte mbyllur baras, pa gola.

 

---