Policia ndërhyn pas përleshjeve mes 200 personave pranë Cyrihut

@pixabay

Një ditë pas përvjetorit të marrjes së pushtetit në Eritreja nga sundimtari aktual, Isayas Afewerki, protestat dhe përleshjet shpërthyen në shumë qytete dje: në Tel Aviv, Izrael, në Bergen, Norvegji dhe në dy qytete në Zvicër, teksa disa persona kanë pësuar lëndime.

Në jug të Cyrihut, në qytetin Opfikon, policia kantonale ndërmori një operacion në shkallë të gjerë mbrëmjen e djeshme, pasi shpërtheu një konfrontim i dhunshëm mes dy grupeve të eritreasve, shkruan Swissinfo, përcjell albinfo.ch.

Policia ia doli të ndante dy grupet dhe të shpërndante tubimin ndërsa fillimisht, takimi do të zhvillohej në kantonin St Gallen, tha zëdhënësi i policisë Ralph Hirt për agjencinë e lajmeve Keystone-SDA.

Operacioni policor në shkallë të gjerë

Oficerët e policisë u vendosën në Glattpark në Opfikon, sipas reporterëve nga televizioni publik zviceran SRF. Deri në 30 makina të policisë dhe ambulanca kishin mbërritur që kur u ngrit alarmi dhe gjithashtu u vendosën një helikopter shpëtimi Rega dhe një helikopter policie.