Për Pashkë, Rusia e Ukraina shkëmbejnë robër lufte

Keystone (AP Photo/ (AP Photo/Rodrigo Abd)

Me rastin e Pashkëve Ortodokse, më shumë se 100 robër lufte ukrainas janë liruar si pjesë e një shkëmbimi me Rusinë. Ukraina po feston për herë të dytë Pashkën në luftë, shkruan Zëri i Amerikës.

Andriy Yermak, këshilltar i presidentit të Ukrainës, njoftoi se 130 ushtarë, marinarë, rojë kufitare dhe të tjerë të kapur nga Moska ishin duke u kthyer në shtëpi pas një shkëmbimi të madh të të burgosurve me rastin e Pashkëve, përcjell albinfo.ch.

Deri më tani nuk dihet sa ushtarë rusë janë liruar, por sipas zyrës së shtypit të Grupit Wagner, mercenarët e së cilit luftojnë për Kremlinin në lindje të Ukrainës, publikoi një video të dielën, ku shihen robërit ukrainas të luftës që po i përgatisnin për shkëmbim.

Zoti Yermak tha në një postim në rrjetin Telegram të dielën se mes të liruarve kishte edhe ushtarë që luftuan pranë qytetit Bakhmut, i cili ka qenë për muaj të tërë në qendër të ofensivës së Kremlinit, përcjell albinfo.ch.