4 shqiptarë të vdekur nga përplasja e trenave në Greqi

Ministria për Evropën dhe Punët e Jashtme e Shqipërisë ka njoftuar që katër shqiptarë janë viktima nga aksidenti tragjik mes dy trenave në Larisa të Greqisë.

Ministria e Jashtme njoftoi pas komunikimit me autoritetet greke. “Në radhët e viktimave të aksidentit tragjik hekurudhor në Larisa konfirmohen deri më tani katër shtetas shqiptarë dhe me origjinë shqiptare. Ata janë: Ifigjenia Micka, Pavlin Bozo, Joanis Xhollas, Klaudia Lato”, thuhet në njoftimin e ministrisë.

Autoritetet shqiptare kanë bërë të ditur se po presin rezultatet e ADN-së edhe për një shtetas tjetër shqiptar që është deklaruar i zhdukur nga familjarët e tij dhe policia greke, raporton Radio Evropa e Lirë, përcjellë Albinfo.ch

Më një mars dy trena u përplasën në Larisa të Greqisë duke lënë rreth 57 të vdekur dhe shumë të tjerë të lënduar. Autoritetet greke janë duke vazhduar me kërkimet e punën për të identifikuar viktimat.