FSK, e gatshme të trajnojë ushtrinë e Maqedonisë së Veriut  

Ministri i Mbrojtjes, Armend Mehaj, ka mbajtur një takim me homologen e tij nga Maqedonia e Veriut, Slavjanka Petrovska, me të cilën diskutuan përbashkëpunimin në trajnime, ushtrime të përbashkëta ndërmjet dy ushtrive.

Ministri kosovar i Mbrojtjes tha se FSK-ja është e gatshme që ushtrisë maqedonase t’u ofrojë trajnime në fushën e kërkim-shpëtimit.

“Aktualisht, FSK është e gatshme që ushtrisë maqedonase t’i ofrojë trajnime në fushën e kërkim-shpëtimit, për të cilën ushtarët tanë janë jashtëzakonisht të përgatitur, ndërsa pala maqedonase do të shkëmbejë me ne përvojën e reformimit të brendshëm përgjatë rrugëtimit në procesin për anëtarësim në programin e Partneritetit për Paqe, në të cilin synojmë dhe ne të jemi anëtar”, ka shkruar Mehaj në Facebook

Sipas tij, janë dakorduar të bashkëpunojnë në integrimin e grave në ushtri, shkëmbimi i praktikave më të suksesshme, shkollimi i oficereve dhe trajnimi i tyre.