Austri: Pse të huajt e kanë të vështirë të integrohen në vendin e punës?

Dan Visan @dsvi

Sondazhi i ‘Expat Insider’ 2022 u bë kryefjalë në fillim të kësaj jave, kur u zbulua se Austria u rendit si vendi i dytë më pak miqësor në botë.

Por rezultatet tregojnë se edhe banorët e huaj kanë vështirësi të integrohen në vendin e punës dhe të ndërtojnë një karrierë në Austri.

Sondazhi i InterNations mori në konsideratë aspekte të tilla, si perspektivat e karrierës, paga, siguria në punë, kultura dhe kënaqësia në seksionin e punës jashtë vendit – diçka që shpesh është një pjesë kyçe e të jetuarit në një vend tjetër, transmeton albinfo.at.

Austria aktualisht renditet e 19-ta nga 52 vende për punën jashtë vendit, duke humbur vendin e saj të lakmuar në dhjetëshen e parë nga viti i kaluar. Ndërsa, 68 për qind e të anketuarve e vlerësojnë sigurinë e punës në Austri si të mirë (krahasuar me mesataren globale prej 59 për qind), vetëm 62 për qind besojnë se paguhen në mënyrë të drejtë për punën e tyre në lidhje me industrinë, kualifikimet dhe rolin e tyre.

Për më tepër, 35 për qind thonë se kultura e biznesit lokal në Austri mbyt kreativitetin dhe të menduarit jokonvencional dhe 26 për qind janë të pakënaqur me perspektivat e tyre të karrierës. Në nivel global, rezultatet janë përkatësisht 26 për qind dhe 22 për qind.

Siç tha një banor ndërkombëtar nga Italia: “Tregu ndërkombëtar i punës është shumë i vogël dhe i kufizuar në pozicione specifike”.

Nga ana tjetër, 72 për qind janë të kënaqur me orët e tyre të punës (krahasuar me 63 për qind globalisht), gjë që përputhet me reputacionin e Austrisë për të pasur një ekuilibër të mirë mes punës dhe jetës.

Për më tepër, të huajt në Austri e kanë të vështirë të miqësohen me vendasit me 52 për qind që thonë se janë të pakënaqur në këtë kategori, transmeton tutje albinfo.at.