Reagon Osmani: E tronditur thellësisht nga humbja e mikes së madhe të Kosovës

'Ajo na dha shpresë, kur nuk e kishim atë, u bë zëri ynë e krahu ynë kur nuk kishim as zë e as krah'- shkruan presidentja Osmani në reagimin e saj pas vdekjes së ish-sekretares amerikane të shtetit, Madeleine Albright

Presidentja e Kosovës, Vjosa Osmani, është shprehur e tronditur thellësisht nga humbja e mikes së madhe të Kosovës, Madeleine Albright, ish-sekretare e Shtetit të SHBA-së, transmeton Albinfo.ch.

“Ajo na dha shpresë, kur nuk e kishim atë, u bë zëri ynë e krahu ynë, kur nuk kishim as zë e as krah. E njohu dhimbjen e popullin tonë, sepse edhe vetë e kishte përjetuar persekutimin qysh në fëmijëri, prandaj qëndroi e vendosur kundër Millosheviqit deri në ndaljen e gjenocidit të tij në Kosovë. E përkrahu pareshtur Kosovën deri në frymën e fundit, prandaj populli i Kosovës do ta kujtojë përjetësisht”, shkruan mes tjerash Osmani, përcjell Albinfo.ch.

Presidentja e Kosovës shkruan tutje se modeli i një heroine të pamposhtur, guximtare e të vendosur për të mbjellur vlerat demokratike në çdo vend, ‘do të mbetet përherë modeli që do e ndjekim ne që patëm fatin ta njohim si dhe shumë breza pas nesh’.

---