Kosova hyn në krizë energjetike, nisin reduktimet e energjisë

Kriza energjetike që ka përfshirë botën ka prekur direkt edhe Kosovën

Pas thirrjeve të institucioneve drejtuar qytetarëve për kursim vjen vendimi i fundit i kompanisë që merret me furnizim të energjisë KEDS e cila ka njoftuar qytetarët se tashmë do të nisin reduktimet, shkruan Albinfo.ch.

“Gjatë ditëve të fundit, sistemi elektroenergjetik i vendit është mbingarkuar tej mase. Të njëjtën kohë, duke u ballafaquar me krizën më të rëndë elektroenergjetike botërore, Operatori i Tregut- KOSTT, duke u bazuar në ligjet në fuqi, ka udhëzuar që të fillohet me kufizime të energjisë elektrike. Këto kufizime do të jenë rreth dy orë dhe do të prekin të gjithë konsumatorët në kohë të ndryshme, përveç atyre emergjentë”, ka njoftuar KEDS.

Për më tepër kjo kompani ka sqaruar se
kjo situatë do të mbizotërojë gjatë 24 orëve të ardhshme, ndërsa për ditët në vijim në janë në pritje të instruksioneve nga KOSTT-i.

“Sistemi elektroenergjetik i vendit është afektuar tashmë komplet nga kriza globale dhe pasojat e saj përballohen më lehtë, nëse secili nga ne jep kontributin e tij. Pra, që kriza të ketë ndikim sa më të vogël, KEDS apelon për kursim maksimal të energjisë elektrike dhe përdorim të formave alternative të ngrohjes, aty ku ka mundësi”, thekson KEDS.

Në anën tjetër Qeveria e Kosovës ende nuk ka dal me ndonjë reagim për sa i përket situatës së fundit ku kanë nisur reduktimet e energjisë.

---