OBSH: Rreziku global nga varianti i ri Omicron është “shumë i lartë”

(KEYSTONE/Ti-Press/Alessandro Crinari)

Rreziku global nga varianti i ri Omicron është “shumë i lartë”, tha të hënën Organizata Botërore e Shëndetësisë, pasi shumë vende raportuan raste të variantit që ka ngjallur shqetësim në mbarë botën.

Një deklaratë e tillë vjen ndërsa rastet e variantit konfirmohen në shumë vende të botës.

“Vetë shfaqja e Omicron është një tjetër kujtesë se megjithëse shumë prej nesh mund të mendojnë se kemi mbaruar me Covid-19, kjo nuk ka përfunduar”, tha Tedros Adhanom Ghebreyesus, drejtor i përgjithshëm i Organizatës Botërore të Shëndetësisë, në një sesion special të Asamblesë Botërore të Shëndetësisë.

Në këshillat me shkrim për shtetet e saj anëtare, agjencia e OKB-së u kërkoi atyre të përshpejtojnë mbulimin e vaksinimit Covid-19 “sa më shpejt të jetë e mundur”, veçanërisht midis grupeve me prioritet të lartë, dhe të rrisin përpjekjet e mbikëqyrjes.