Kosova, e gatshme të strehojë afganët, kërkon verifikimin e të kaluarës së tyre

Qeveria e Kosovës është në diskutim me autoritet në SHBA për strehim e afganëve, kërkon t’iu verifikohet e kaluara

Qeveria e Kosovës ka shprehur gatishmërinë për të negociuar me SHBA-në për strehimin e përkohshëm të afganëve, të cilët po lëshojnë Afganistanin.

Luan Dalipi, shef i stafit të kryeministrit të Kosovës, Albin Kurti, ka thënë për Albanian Post se janë në komunikim të vazhdueshëm me autoritet amerikane për të strehuar afganët që kanë punuar me forcat amerikane.

“Që nga mesi i korrikut jemi në komunikim dhe bashkëpunim të vazhdueshëm me autoritetet shtetërore dhe ushtarake amerikane për këtë çështje të dhimbshme e të ndjeshme”, tha Dalipi.

Sipas tij, ka shumë punë logjistike e teknike, të sigurisë dhe sociale, që po i trajtojmë me kujdes.

“SHBA-ja është aleati ynë kryesor dhe partneri ynë strategjik. Gjithçka do të përmbyllet mirë”, theksoi Dalipi.

Butrint Berisha nga Instituti i Prishtinës për Studime Politike, thotë se strehimi i afganëve do të ishte veprim i drejtë moralisht dhe politikisht.

“Moralisht do të ishte veprim i drejtë, duke marrë për bazën historinë e shtetit dhe popullit të Kosovë që është ngushtë e lidhur me eksodin. Në momente të vështira shumë shtete kanë hapur dyert për qytetarët e ikur nga Kosova dhe është e pritshme që shteti i Kosovës, i cili tash është në anën tjetër të spektrit, të tregojë solidaritet”, potencoi Berisha, përcjell Albinfo.ch.

Nga ana tjetër, njohësi i çështjeve të sigurisë, Drizan Shala, mendon se strehimi i afganëve pa ia verifikuar të kaluarën, mund të jetë e dëmshme për sigurinë e Kosovës.

“Kush i verifikon këta persona, pasi do qëndrojnë në Kosovë e Shqipëri deri t’ju bëhet verifikimi në një interval kohor 12/18 muaj, për t’i lejuar të hynë në territorin e SHBA-së”, ka thënë Shala.

Qeveria, sipas tij, duhet të kërkojë nga Departamenti Amerikan i Shtetit një buxhet në formën e mbështetjes, “meqë ne do të luajmë rolin e “zonës neutrale të sigurisë”.

Edhe ish-kryeministri i Kosovës, Ramush Haradinaj, ka kërkuar se Kosova duhet t’i strehojë afganët dhe t’i qëndrojë pranë SHBA-së.

“Kosova të jetë vullnetare në strehimin e disidentëve afganë dhe të jetë pranë Shteteve të Bashkuara të Amerikës, ashtu siç ishin ata pranë nesh, kur riatdhesuam shtetasit e Kosovës nga Siria”, ka nënvizuar Haradinaj.

 

---