Kosovë: Arrestohen 7 zyrtarë nën dyshimet për keqpërdorim detyre

Foto ilustrim

Prokuroria Themelore në Pejë ka njoftuar se pas hetimeve nën dyshimet për keqpërdorim të detyrës zyrtare për ndërtimet e kundërligjshme janë ndaluar shtatë persona të dyshuar për veprën penale “Keqpërdorim i pozitës zyrtare apo autoritetit zyrtar”, në Komunën e Pejës.

Përmes një njoftimi, Prokuroria Themelore e kësaj komune në koordinim me Policinë e Kosovës ka shoqëruar këta persona në stacionet përkatëse policore.

“Pas intervistimit të tyre me urdhër të prokurorit të shtetit, ata janë dërguar në ndalim prej 48 orësh”, thuhet në njoftim.

Dy drejtorët e ndaluar për këtë vepër penale janë, Drejtori i Drejtorisë për Çështje Pronësore Juridike në Komunën e Pejës, A.K., dhe Drejtori i Drejtorisë për Kadastër dhe Gjeodezi, M.N.

Listës së të ndaluarve i bashkohet edhe Inspektori i ndërtimit në Drejtorinë e Inspektoratit në Komunën e Pejës, M.B., Zyrtari ligjor në Drejtorinë për Kadastër dhe Gjeodezi, A.LL., Ish punëtori i Drejtorisë për Çështje Pronësore Juridike, O.K. dhe dy Gjeodetët e licencuar nga Agjencia Kadastrale e Kosovës, P.T. dhe P.B.

Bazuar në njoftimin e Prokurorisë, thuhet se “prokurori i çështjes, brenda afatit ligjor do bëjë vlerësimin për kërkesat eventuale për sigurimin e prezencës se të pandehurve në procedurë penale”.