Plagoset një polic në protestën kundër masave të koronës, në Lucern

Një polic është sulmuar fizikisht dhe është plagosur nga dy persona në Inseliquai dhe u desh të çohej në spital. Dy personat në fjalë janë arrestuar përkohësisht

Në qytetin e Lucernit, disa mijëra njerëz kanë demonstruar në një tubim të miratuar nga autoritetet, kundër kufizimeve të koronës dhe kundër fushatës së vaksinimit, raporton srf.ch.

Sipas policisë së Lucernit, në tubim kanë marrë pjesë rreth 4,500 deri në 5,000 njerëz, duke e bërë kështu njërin ndër aktivitetet më masive në Zvicër kundër masave të koronës, tranmseton albinfo.ch.

Aleanca e aksionit të Kantoneve themeltare të Zvicrës (Aktionsbündnis Urkantone), që ishte organizatore e tubimit, ka lëvizur nga sheshi Mühlenplatz në Inseli, ku, në tribunë janë paraqitur folës të ndryshëm.

Rruga kryesore nga Bahnhofplatz në Schwanenplatz është dashur të mbyllej për trafik për rreth 30 minuta. Demonstruesit kanë kritikuar shtetin se me politikën e koronës kufizon pa nevojë liritë e popullit. “Liria është sistematikisht e rëndësishme”, mund të lexohej në njërën nga pankartat.

Në të njëjtën kohë, në sheshin Kurplatz është mbajtur një tubim nga organizata “Lucerni është shumëngjyrësh”, i cili gjithashtu ishte i miratuar. Në të kanë marrë pjesë rreth 100 persona. Policia është përpjekur t’i mbante pjesëmarrësit e dy tubimeve të ndarë nga njëri -tjetri.

Por, në margjinat e tubimit, një polic është sulmuar fizikisht dhe është plagosur nga dy persona në Inseliquai dhe u desh të çohej në spital, përcjell albinfo.ch. Dy personat në fjalë janë arrestuar përkohësisht.

---