KQZ-ja fillon publikimin e rezultateve të subjekteve politike dhe kandidatëve për deputetë

Komisioni Qendror i Zgjedhjeve, me qëllim të rritjes së transparencës dhe besueshmërisë në procesin zgjedhor, ka filluar publikimin e kopjeve të skanuara të formularëve të rezultateve për subjektet politike dhe kandidatët për zgjedhjet e parakohshme për Kuvendin e Republikës së Kosovës, të cilat u mbajtën të dielën.

Kështu ka bërë të ditur përmes një konference për medie, zëdhënësi i KQZ-së, Valmir Elezi.

“Të gjithë të interesuarit do të mund të shohin rezultatet e subjekteve politike dhe kandidatëve për secilin vendvotim, duke shfletuar kopjet e këtyre formularëve, të cilët janë plotësuar në vendvotime nga Anëtarët e Këshillave të Vendvotimit, të dielën në mbrëmje pas numërimit të fletëvotimeve. Publikimi i formularëve nga komunat e tjera është në proces. Pra, pas përfundimit të skanimit të tyre nga ndonjë komunë, formularët do të publikohen në ueb faqen e KQZ-së”, tha Elezi.

Ai sqaroi seky publikim nuk është shpallje e rezultateve përfundimtare, por këto janë vetëm forma të rezultateve të plotësuara në vendvotime, më 14 shkurt 2021, raporton Telegrafi, përcjell Albinfo.ch.

“Rezultatet përfundimtare shpallen pas numërimit të votave me kusht; votave përmes postës; votave të personave me nevoja të veçanta dhe pas përfundimit të të gjitha procedurave në Qendrën e Numërimit dhe të Rezultateve”, tha ai.