Gjermania po humb kontrollin e menaxhimit të Covid-19

Evan Wise @evanthewise

Instituti „Robert Koch” bëri të ditur të shtunën më shumë se 28.000 infektime kanë qenë në 24 orët e fundit, kurse numri i vdekjeve është rritur me 496 vetë.

Si duket, masat e marra në nëntor qartazi nuk e arritën efektin e tyre. Tani për shkak të shifrave në rritje të infektimeve, janë rritur kërkesat që të kufizohet jeta publike edhe para Krishtlindjeve.

Ani pse Gjermania konsiderohej si nxënësja shembullore në Europë për shkak të menaxhimit të mirë të pandemisë, tani po përballet jo vetem me shifra të larta infektimesh me virusin Corona, por edhe të vdekjeve.

Presidenti gjerman, Frank-Walter Steinmeier, e cilësoi situatën „shumë serioze”. „Nëse si tani do të vazhdojnë të infektohen dhjetëra mijëra vetë me virusin, nëse vdesin qindra vetë në ditë nga virusi, atëherë kjo do të thotë se urgjentisht ne duhet të forcojmë përpjekjet tona në luftë kundër pandemisë”. „Kemi nevojë për një përgjigje të përgjithshme gjermane”, tha edhe kryeministri i landit Renani Veriore-Vestfali, Armin Laschet, të premten në Dyseldorf. „Ne nuk duam një mozaik në gjithë Gjermaninë, ku secili land ndjek rrugën e vet”.

Në Gjermani flitet për një mbyllje deri më 10 janar, në të njëjten kohë duhet të mënjanohen blerjet masive. Detyrimi për shkollën do të mbetet, por do të hiqet detyrimi për mësimin me prezencë në shkollë. Që nga e hëna faktikisht prindërit mund të vendosin në landin me popullsinë më të madhe në Gjermani, Renani Veriore-Vestfali, nëse do t’i dërgojnë fëmijët në shkollë apo do t’i lënë në shtëpi. /Albinfo.ch