Maqedonia planifikon të shpallë gjendje të krizës

KEYSTONE/EPA/GEORGI LICOVSKI

Pas mbledhjes së Këshillit për Siguri te presidenca në “Vilën Vodno”, kreu i shtetit, Stevo Pendarovski, tregoi se është vendosur të propozohet shpallje e gjendjes së krizës në gjithë territorin e Maqedonisë së Veriut, e që do të zgjasë 30 ditë.

Presidenti tha se gjendja me pandeminë në vend është shumë serioze. Kryeministri Zoran Zaev ndërkaq informoi se sonte, ose më së voni nesër, Qeveria do të mbajë seancë, ku do të shpallet gjendja e krizës, shkruan euronews, transmeton Albinfo.ch.

Kjo gjendje nuk lidhet me orën policore ose ndalesën e lëvizjes, Zaev theksoi se tani për tani nuk janë duke menduar për orë policore, po megjithatë nuk e përjashtoi mundësinë për këtë masë në të ardhmen.

Gjendja e krizës nënkupton se edhe ushtria do të kyçet në luftën ndaj pandemisë, por gjithashtu edhe të gjitha kapacitetet dhe kuadrot e spitaleve private vihen në dispozicion të shtetit.

Kjo është hera e parë që në Maqedoninë e Veriut mund të shpallet gjendje krize në gjithë territorin. Gjendje e tillë është shpallur vetëm në rajone të caktuara, siç ka qenë në jug dhe veri të vendit, gjatë krizës me migrantët.

Në mbledhjen e sotme të Këshillit morën pjesë të gjithë anëtarët, përveç ministrit të Brendshëm. Me ftesë të veçantë nga presidenti i pranishëm ishte edhe ministri i Shëndetësisë, Venko Filipçe, i cili ka informuar për gjendjen me pandeminë dhe kapacitetet për përballje me të.

Këto propozimet të krerëve të lartë të shtetit fqinj vijnë pas rritjes se rasteve të të infektuarve dhe numrit të viktimave nga Covid-19.