Zyrtarë të OBSH-së: Vala e dytë e COVID-19 duhet luftuar pa vaksina

Keystone EPA/DIEGO AZUBEL

Vaksinat nuk do të arrijnë në kohë për të luftuar valën e dytë të pandemisë së COVID-19 dhe shumë vende do të duhet të vazhdojnë ta përballojnë atë pa vaksina, paralajmëroi sot kreu i OBSH-së për Situatat e Urgjencës, Michael Ryan, shkruan AFP, përcjell Albinfo.ch.

“Unë mendoj se do të duhen të paktën katër deri në gjashtë muaj para se të ketë nivele të mjaftueshme të imunizimit kudo”, tha ai në një seancë pyetje-përgjigje në mediat sociale, duke theksuar se vaksinat nuk duhet të shihen si një “ilaç magjik”.

“Ne nuk jemi ende atje ku duhet në lidhje me vaksinat, pavarësisht njoftimeve të fundit për vaksina premtuese, që janë 90% ose më shumë të efektshme”, shtoi Ryan.

“Shumë vende po përballen me këtë valë. Ato do ta kapërcejnë atë dhe do të vazhdojnë të përballen me të pa vaksina”.

Njoftimi të hënën nga kompania bioteknike amerikane “Moderna” për një vaksinë efikase në 94,5%, pas atij të bërë javën e kaluar nga laboratori amerikan “Pfizer” dhe ai gjerman “BioNTech” për një efikasitet në 90%, ndezi një valë të re të optimizmi në botë.