Gjermani: Sërish rritje e numrit të rasteve me COVID-19

Keystone - Roman Kraft

Është bërë e ditur se Gjermania ka shënuar sërish rritje të numrit të rasteve të reja me virusin korona.

Duhet theksuar se gjatë 24-orëve të fundit, sipas Institutit Robert Koch (RKI) për sëmundjet infektive, në këtë shtet janë regjistruar të mërkurën edhe 1.256 raste të reja me COVID-19. Sipas të dhënave të fundit, numri i përgjithshëm i të infektuarve ka arritur në 244 mijë e 855.

Ndërkaq, numri i të vdekurve në shtetin gjerman ka arritur shifrat në 9.313.

Përkundër rritjes së numrit të të infektuarve, në Gjermani mund të shmanget një mbyllje e dytë totale. Kështu ka thënë ministri i Ekonomisë dhe Energjisë, Peter Altmaier. Altmaier, në një konferencë për medie, ka thënë se më e keqja e pandemisë tashmë ka mbetur pas shpinës për Gjermaninë, pasi siç është shprehur ai, ekonomia e vendit ka shënuar përmirësim nga muaji maj. /Albinfo.ch