Zyrtare: Kurti mbulon Kartonin e Gjelbër të mërgimtarëve

Vjen njoftimi zyrtar nga Qeveria e Kosovës për Kartonin e Gjelbër

Qeveria në detyrë e Kosovës në mbledhjen e fundit të saj ka marr vendim që t’i mbulojë shpenzimet e Kartonit të Gjelbër për diasporën që vijnë në Kosovë.

Me propozimin e ministrit të Financave dhe Transfereve të Kosovës, Besnik Bislimi ky mbulim do të bëhet për gjatë vitit 2020.

“Ministria e Financave dhe Transferve ka dal me një draft për Pakon e Rimëkëmbjes Ekonomike, ku një ndër pikat ne kemi paraparë edhe marrjen e obligimit nga ana e qeverisë lirim e kostos së Kartonit të Gjelbër me diasporën. Unë nxjerr para juve një propozim-vendim që t’i mbuloj kostot për këtë gjatë vitit 2020”, tha Bislimi, përcjell albinfo.ch.

Në kuadër të Pakos së Rimëkëmbjes Ekonomike, qeveria kishte planifikuar që të marrë përsipër mbulimin e kostos së polisave kufitare për automjetet që hyjnë në vend për vitin 2020.

“Në linjë me pikën 12.4. të Programit të Qeverisë, kapitulli “Mërgata”, u aprovua kërkesa e Ministrisë së Financave dhe Transfereve për fillimin e procedurave për krijimin e mekanizmit për mbulimin e obligimeve të sigurimit kufitar (Kartoni i Gjelbër) nga Qeveria e Republikës së Kosovës për të gjithë bashkatdhetarët dhe të huajt që vijnë në Kosovë gjatë vitit 2020”, thuhet në njoftim.

---