Cila është gjendja shëndetësore e të plagosurit nga policia serbe

Foto Ilustrim

Është bërë e ditur se Policia serbe ka plagosur një shqiptar në Medvegjë, i cili shërbente si roje në malin që ndan Kosovën dhe Serbinë.

Këtë lajm e ka bërë të ditur Kryetari i Këshillit Kombëtar Shqiptar, Ragmi Mustafa, i cili ka pohuar se ky është një lajm sa i hidhur, po aq i tmerrshëm.

“Një lajm sa i hidhur, po aq i tmerrshëm. Plagoset i riu nga Gërbaci i Medvegjës, nga autoritet policore. Le të lutemi që të shpëtojë nga fataliteti”, ka shkruar Mustafa në faqen e tij në Facebook.

Shqiptari nga Gërbaci i komunës së Medvegjës, me inicialet M.M, derisa po bënte roje është plagosur nga policia serbe.

Thuhet se ai pas plagëve që ka marrë, është dërguar në Spitalin Rajonal të Gjilanit, ndërsa më pas u transportua në Qendrën Klinike Universitare të Kosovës.

Ndërsa, shefi i repartit të Emergjencës në QKUK, Naser Syla, ka bërë të ditur se e kanë pranuar viktimën rreth orës 18:30, derisa i njëjti është jashtë rrezikut për jetë.

“I plagosuri ka dy plagë, derisa gjendja e tij nuk është e rëndë. Tani e kemi dërguar për CT. Në Spitalin e Gjilanit e kanë trajtuar shumë mirë, ndërsa ne jemi duke bërë ekzaminimin, për të parë nëse ka nevojë  që të hyjë në sallën e operimit”.

Ndryshe, ende nuk dihen rrethanat e plagosjes së 34-vjeçarit shqiptar, përcjell albinfo.ch.

https://www.youtube.com/watch?v=28Y7SwIFqu8