Gjermanët festojnë rrëzimin e Murit të Berlinit

Qindra mijëra berlinezë dhe vizitorë të kryeqytetit festojnë këtë fundjavë rrëzimin e Murit para 25 vjetësh

Pika kulmore më e shkëlqyer është një instalacion dritash, që kalon përgjatë vijës ku kalonte muri i Berlinit.

Motivi i fotografuar më shumë në kryeqytet dallohet menjëherë: është instalacioni me 7000 llampa me drita, të cilët shënjojnë vijën ku kalonte më parë Muri. Një spektakël optik, që i entuziasmon njëlloj si berlinezët edhe vizitorët.

Deri të dielën në mbrëmje “kufiri i ndritshëm” do të kalojë mes për mes qytetit, nga Porta e Brandenburgut deri në kalimin e dikurshëm kufitar në rrugën Bornhomer, ku në mbrëmjen e 9 nëntorit 1989 u ngrit trari i parë.

Pjesa zyrtare e festimeve fillon të dielën në vendin përkujtimor në rrugën Bernauer Straße. Kancelarja Angela Merkel sic transmeton DW do të kujtojë të rënët tek Muri.

etëm në Berlin buzë Murit kanë humbur jetën 138 vetë, pjesa më e madh u qëlluan për vdekje nga pikat kufitare të RDGJ gjatë përpjekjes për t’u arratisur. Këta të rënë përkujtohen edhe me një ekspozitë në vendin përkujtimor.

Në shesh gjendet copëza e fundit e Murit të Berlinin, e cila është ruajtur bashkë me strukturën e gjerë të kufirit. Se sa i madh është interesimi për historinë e Murit dhe fatet e lidhura me të, e tregon vërshimi i vizitorëve.

Më shumë se 5 milionë turistë dhe berlinezë e kanë vizituar deri tani vendin përkujtimor. Merkel do ta hapë vizitën në vendin përkujtimor me një fjalim.

Më parë së bashku me kryebashkiakun në largim të Berlinit Klaus Wowereit do të marrë pjesë në një meshë në Kishën e Pajtimit, e cila gjendet në mes të vijës së dikurshme të vdekjes.

Pas një akti festiv në sallën e kongreseve në sheshin Gendarmenmarkt dhe një feste qytetare me muzikë live në Portën e Brandenburgut, festimet marrin fund në mbrëmje dhe atëherë tullumbacet e ndritshëm do të lëshohen në qiellin e mbrëmjes mbi Berlin duke e shpërbërë në mënyrë simbolike “murin e dritave”.