Fluturimi për në SHBA, vetëm me bateri të mbushura të aparateve

Kush udhëton direkt nga Cyrihu për në SHBA do t`i nënshtrohet edhe një kontrollimi plotësues. Objekt i kontrollimit do të jetë nëse bateritë kanë ende rrymë ose jo

Pasagjerët që duan të fluturojnë drejtpërdrejt nga Aeroporti i Cyrihut në SHBA duhet të sigurohen se në bateritë në telefonat mobilë, laptopët apo aparatet fotografike të mos jenë të zbrazura. Kjo masë e re sigurie hyn në fuqi menjëherë.

Që në fillim të korrikut autoritetet amerikane për siguri të transportit (TSA) kishin bërë të ditur se aeroplanët që bëjnë fluturime direkte në SHBA nuk pranojnë udhëtarë me bateri të zbrazëta të aparateve të tyre të ndryshme elektronike.  Por, atëbotë ende nuk ishte e qartë se për cilat vende do të vlenin këto masa të ashpërsuara.

Ndërkohë, siç njoftohet nga Aeroporti i Cyrihut, masat në fjalë vlejnë që prej sot edhe për fluturimet nga Cyrihu. Kush udhëton direkt nga ky aeroport për në SHBA do t`i nënshtrohet edhe një kontrollimi plotësues. Objekt i kontrollimit do të jetë nëse bateritë kanë ende rrymë ose jo. Përgjegjëse për kontrollimet e përmendura janë kompanitë ajrore.  

Arsyeja për këtë masë shtesë kontrollimi qëndron në frikën se pjesëtarët e Al-Kaidas në Siri dhe në Jemen janë bashkuar për të konstruktuar bomba dhe mjete shpërthyese kështu që do të kenë mundësi t`i transportojnë ato përmes vijave ajrore, duke i futur edhe në aparatet e përmendura elektronike.