Aksion policor i përmasave të gjera

Gjatë aksionit të shtrirë në shtatë kantone gjermanishtfolëse ku janë kontrolluar 2000 persona dhe 2900 automjete janë arrestuar 16 persona

Si rezultat i një aksioni të kontrollit me shtrirje të gjerë të udhëhequr nga disa polici kantonale dhe nga rojat kufitare në gjithë Zvicrën gjermane janë arrestuar 16 persona. Në mesin e tyre janë shtatë që dyshohen për përfshirje ne krime.  

Përveç arrestimit, policia ka arritur që të parandalojë një numër deliktesh pasi që në mesin e atyre që ka kapur, disa kanë qenë të pajisur me “mjete të punës”, dhe të përgatitur për të kryer plaçkitje ose delikte tjera.

Gjatë këtij aksioni që ka filluar pasditen e të enjtes dhe ka përfunduar paraditen e të premtes, janë kontrolluar 2000 persona dhe 2900 automjete, njofton Policia Kantonale e Aargaut, e cila ka pasur rolin e koordinatores.

Në aksion që ishte i drejtuar kryesisht  kundër kriminelëve “turistikë” kanë marrë pjesë më shumë se 300 policë dhe roja kufiri, shkruan nzz.ch. Konkretisht pjesëmarrëse kanë qenë policitë përkatëse të kantoneve: Basel-Stadt, Basel-Landschaft, Luzern, Solothurn, Zug dhe Cyrih.

Bashkë me ta kanë qenë edhe Rojat Kufitare Zvicerane, policia e transportit e SBB/CFF si dhe njësitet e policisë ushtarake. Ndërsa në pjesët afër kufirit, aksionit i janë bashkëngjitur edhe forcat policore gjermane, gjegjësisht ato nga landi Baden-Württemberg.