Numri i personave që punojnë në Zvicër dhe jetojnë jashtë saj, në rritje

Shtimi ka të bëjë në radhë të parë me rritjen e numrit të personave nga Italia dhe nga Franca, të cilët kanë ardhur për të punuar në Zvicër

Në tremujorin e dytë të këtij viti është regjistruar një rritje e konsiderueshme e numrit të të huajve nga zonat kufitare, të cilët punojnë në Zvicër. Numri i “kaluesve të kufirit“ (Grenzgänger ose Frontalieri), siç identifikohen këta punëtorë nga Italia, Franca, Gjermania dhe Austria, në fund të qershorit ka qenë 323.000, shkruan srf.ch.

Ky numër është për 2.4 për qind më i madh se në tremujorin e dytë të një viti më parë, transmeton albinfo.ch. Rritja e shënuar tregon për atraktivitet të shtuar të vendeve të punës në Zvicër, shkruajnë mediet zvicerane.

Shtimi ka të bëjë në radhë të parë me rritjen e numrit të personave nga Italia dhe nga Franca, të cilët kanë ardhur për të punuar në Zvicër. Ndërsa, nga ana tjetër, numri i gjermanëve ka shënuar rënie.

Sikurse edhe deri tash, më së shumti punëtorë të tillë të huaj janë regjistruar në regjionin e Liqenit të Gjenevës, që përfshin Kantonin e Gjenevës dhe atë të Vaudit, përcjell albinfo.ch. Në këtë regjion janë të punësuar çdo i treti “Frontalier” në Zvicër. Pas kësaj zone vjen ajo e Zvicrës Veriperëndimore (Bazel, Baselland) dhe Tiçino ose Zvicra jugore.

Karakteristikë e këtyre punëtorëve është se ata punojnë në Zvicër, por vazhdojnë të jetojnë me familjet në vendet e tyre përkatëse.

---