Qindra kosovarë do të nisen për në Haxh, do të paguajnë nga 4150 euro

Foto ilustrim (Adli Wahid)

1080 besimtarë të fesë islame do të nisen nga Kosova për në Haxh sivjet, përcjell albinfo.ch.

Kështu ka njoftuar Bashkësia Islame e Kosovës, teksa ka bërë të ditur se çmimi për person do të jetë 4150 euro.

“Kryesia e Bashkësisë Islame e Kosovës ka bërë të gjitha përgatitjen për nisjen e haxhinjve drejt vendeve të shenjta Kryesia e Bashkësisë Islame të Kosovës, gjegjësisht Drejtoria e Haxhit ka bërë të gjitha përgatitjet për nisjen e haxhinjve të Kosovës drejt vendeve të shenjta për të kryer një nga pesë kushtet e fesë Islame, haxhin”, thuhet në njoftim.

Tutje, BIK ka njoftuar se Fitim ef. Gashi nga Drejtoria e Haxhit ka thënë se këtë vit, nën organizimin e Kryesisë së BIRK-ut për vende të shenjta, për të kryer haxhin do të udhëtojnë 1080 besimtarë, në mesin e të cilëve 370 janë gra.

Ai po ashtu ka njoftuar se grupi i parë i haxhinjve do të nisen nga Prishtina më 31 korrik, për të vazhduar pastaj në datat 1, 2 dhe 3 gusht kur do të niset edhe ekipi i fundit i haxhinjve drejt vendeve të shenjta, përcjell albinfo.ch.