30 për qind më shumë dëmtime të makinave, të shkaktuara nga vapa

TCS: Dëmet e regjistruara më së shpeshti, kanë qenë ato në akumulatorët e makinave, në pjesë të motorit dhe në elektronikë

Temperaturat e larta që kishin përfshirë Zvicrën gjatë javës që po shkon, pos dëmeve tjera, kanë shkaktuar edhe një rritje të madhe të aksidenteve ose dëmtimeve të ndryshme të autoimjeteve në komunikacionin rrugor.

Sipas TCS, shërbimit që ndihmon në rastet e problemeve në trafikun rrugor, ditëve të fundit në Zvicër ka pasur një ngritje prej 30 për qind të kërkesave për ndihmë nga ky shërbim, shkruan sda.ch.

Shkak për këtë ka qenë vala e vapës që ka përfshirë vendin gjatë gjithë javës, vlerëson TCS në një komunikatë për medie. Sipas saj, dëmet e regjistruara më së shpeshti, kanë qenë ato në akumulatorët e makinave, në pjesë të motorit dhe në elektronikë.

Akumulatorët më të vjetër se 5 vite, sipas TCS , janë shumë më të ndishëm ndaj dëmtimeve, në temperaturat mbi 60 gradë, transmeton albinfo.ch. Në kushtet e vapës së madhe që ka mbretëruar ditëve të fundit, TCS këshillon të mbahen në mbikëqyrje edhe temperaturat e motorit dhe të vajit.

Përveç valës së nxehtësisë, një shkak tjetër për rritjen e numrit të dëmtimeve dhe aksidenteve në trafikun rrugor është edhe shtimi i pjesëmarrësve në trafik, nga shkaku i pushimeve verore që janë në kulminacion, thuhet më tutje në komunikatë.

---