Rama apel bizneseve: Mos e sprovoni shtetin, nuk ka tolerime

Foto ilustrim

Kryeministri Edi Rama ka apeluar sot te bizneset që të mos e sprovojnë administratën dhe shtetin, duke mos punuar rregullisht me faturat përkatëse.

Gjatë një takimi me drejtuesit e tatimeve, kryeministri Rama theksoi se “kemi zgjedhur prej më shumë se 6 muajsh një qasje këshilluese, informuese, edukuese, duke mos preferuar të shkojmë te hapi i fundit, pa bërë hapat e tjerë”, transmeton ATSH.

Kjo periudhë, theksoi Rama, “ka përfunduar dhe besoj që legjislacioni është i qartë dhe masat që legjislacioni parashikon për çdo biznes që nuk punon rregullisht me faturat përkatëse janë të atilla që nuk ia vlen aventura e moslëshimit të faturës. Dihet që nëse nuk lëshon një kupon në një lokal, të mbyllet lokali. Në një njësi tregtare, të mbyllet njësia, për një periudhë që të sjellë një dëm të madh”, u shpreh Kryeministri.

Ai po ashtu ka bërë të ditur se nuk do të tolerohet askush.

“Kështu që ju lutem të gjithëve, mos e sprovoni administratën dhe mos e sprovoni shtetin, sepse nuk do tolerohet askush”, ishte apeli i kreut të Qeverisë ndaj bizneseve.