Zvicerani prodhon pijen energjike shqiptare, fitimin ia dedikon zhvillimit të Kosovës

“90 për qind të fitimit do të investohet në rindërtim”, premton Brun. Ai synon të stuimulojë nxënësit, të ndërtojë objekte sportive dhe shkolla. “Është koha që më në fund dikush të investojë në regjion”

Zvicerani Markus Brun ka vendosur që me pijen e tij të re energjike ”Shqip King” të hyjë në konkurrencën e ashpër të pijeve të këtij lloji në Zvicër. E veçanta e investimit të tij është se ai, një pjesë të fitimit nga shitja do ta derdhë në projekte humanitare në Kosovë, shkruan blick.ch.

Kur Xherdan Shaqiri, Granit Xhaka dhe Stephan Lichtsteiner  më 22 qershor 2018 në Kampionatin Botëror të Futbollit në Rusi, në ndeshjen Zvicër-Serbi “bënë shqiponjën” me duar të kryqëzuara, Markus Brun nga Lucerni ishte ndier i mrekulluar para ekranit televiziv, transmeton albinfo.ch. “Kjo është sikur të fitosh një gjashtëshe në loto!”, kishte brohoritur zvicerani 33 vjeçar.

Dhe nuk ishte diçka për t`u habitur, pasi që ky gjest i futbollistëve shpejt mori dhenë. Madje qe zgjedhur dhe gjesti i vitit. Por, arsyeja e gëzimit të tij të papërshkrueshëm ishte diku tjetër: Brun e kishte licencuar tashmë dy muaj më parë, më saktë më 21 prill 2018  logon me shiponjën dklrenore dhe markën “Shqip King”, transmeton albinfo.ch. “E pabesueshme, unë pata me të vërtetë fat!”, shprehet i gëzuar edhe sot Markus Brun.

Rreth festimit me shqiponjën dykrenore është debatuar me javë të tëra, me ide pro dhe kundër. “Por çfarë rastësie”, thotë tani Markus. “Gjithmonë kam pyetur përse shqiptarët nuk kanë një brend të tyrin, kur janë një popull kaq krenar”. Kështu, ai i përvishet punës: shqiponja e vogël me dy krerë bëhet bashkë me demin e madh (simboli i pijeve energjike).

150.000 kanaqet e para me shijen e ëmbël të pijes energjike ai i ka shitur para hyrjes në treg. Së shpejti ajo do të jetë edhe brenda asortimentit zviceran të 30 depove Prodega që janë pjesë e sektorit Transgourmet të Coop-it, shkruan blick.ch. Pija është shërbyer edhe në bare dhe klube të ndryshme, përcjell albinfo.ch. Prodhimi i Shqip King bëhet në Austri. “Ata e njohin punën”, thotë Brun dhe qeshet. Kështu, ai tani është në lojë me konkurrentin e madh, Red Bull-in.

Një pjesë e fitimit, për projekte humanitare në Kosovë

“90 për qind të fitimit do të investohet në rindërtim”, premton Brun. Ai synon të stimulojë nxënësit, të ndërtojë objekte sportive dhe shkolla. “Është koha që më në fund dikush të investojë në regjion”.

Projekti i parë është rindërtimi i plotë i një shkolle në Uglar të Gjilanit, Kosovë. “Ne i zhvillojmë të gjitha punët në mënyrë të drejtpërdrejtë me një firmë atje, në mënyrë që me të vërtetë çdo cent te derdhet aty ku e ka vendin”.

Sekretin e recetës së pijes ai e ruan për vete. Brun tregon vetëm kaq: “ajo ka shije të ngjashme me atë të konkurrencës”. Ai i ka në zhvillim versionet e reja të pijes së tij. Njëra nga kanaqet e ardhshme do të jetë me ngjyrat e Flamurit Shqiptar, kuq e zi, transmeton albinfo.ch. Sigurisht, me pijen e tij Brun synon konsumatorët shqiptarë në Kosovë, Shqipëri dhe Maqedoni.

Më vonë, ndërmarrësi i ri dëshiron të ngrejë një ekip garuesish të makinave sportive dhe kështu të promovojë garuesin e parë shqiptar të makinave i cili duhet të ketë sukses ndërkombëtar, shkruan blick.ch. Kështu, Brun duket se po i “jep gas” punës në kuptimin e plotë të fjalës.

Fotot: Blick.ch

---