Arrestohet kapiteni i anijes që u fundos në Danub

Shumë persona kanë humbur jetën pas përmbysjes së një anije në lumin Danub, në Budapest. Mbi 20 të tjerë janë ende në kërkim dhe mendohet që kur të gjenden nuk do të jenë gjallë

Pas fatkeqësisë së mbytjes së një anijeje me të paktën shtatë të vdekur dhe 21 të zhdukur në Danub të Budapestit, është arrestuar të enjten në mbrëmje kapiteni i anijes. Sipas të dhënave të policisë, në bazë të dëshmive personale dhe materialeve të tjera, ekzistojnë “momente dyshimi” për arrestimin e kapitenit ukrainas. Nuk u bë e ditur me se kanë të bëjnë këto dyshime. Kërkimi për gjetjen e viktimave vazhdon pa pushim, mbas kësaj katastrofe nga më të rëndat në historinë e Hungarisë, raporton DW.

Të mërkurën në mbrëmje, një varkë lundrimi me turistë nga Koreja e Jugut u përplas në segmentin e Danubit që kalon në mes të Budapestit, me një anije shumë më të madhe Cruise, dhe u mbyt. Shtatë vetë humbën jetën, shtatë u shpëtuan. Nga Koreja e Jugut është nisur një ekip për të ndihmuar në vendin e ngjarjes, përcjell albinfo.ch.

Shpresat për të gjetur të mbijetuar të tjerë janë të pakta. Rrymat e mëdha dhe mjegulla që pengon shikimin kanë vështirësuar punën e forcave të ndërhyrjes. Policia bëri të ditur se ka gjetur një trup pa jetë disa kilometra larg vendit të ngjarjes.

Varka e lundrimit, “Hableany”, me koreanojugorët në bord u mbyt pak sekonda pasi u përplas me anijen Cruise. Shtatë pasagjerë u shpëtuan menjëherë pas përplasjes nga anijet e tjera që ndodheshin në afërsi. Të shpëtuarit u dërguan në spital për tu trajtuar nga ulja e temperaturës së trupit.

Ushtarë pionierë filluan me ngritjen e një platforme zhytjeje. Zhytës të specializuar u futën në karabinanë e anijes së mbytur dhe përgatitën tërheqjen e saj. Niveli i lartë i ujit, rrymat e forta dhe kushtet e këqija të motit kanë vështirësuar punën e tyre. “Nxjerrja e anijes së mbytur mund të zgjasë me ditë ose javë”, ka thënë për agjencinë e lajmeve MTI, drejtori i firmës së specializuar me nxjerrjen e anijeve.

Policia hungareze bëri të ditur se të mërkurën në mbrëmje, anija e lundrimit me turistë i doli para anijes Cruise, kur ndodheshin poshtë Urës Margarete, dhe u përplas me të. Anija e vogël u mbyt brenda shtatë sekondash.

Lundrimi me anije preferohet shumë nga turistët

Në anijen Cruise, “Viking Sigyn” që lundron nën flamurin zviceran, nuk u lëndua kurrkush as nga ekuipazhi as nga turistët.

Sipas njoftimeve të agjencisë koreanojugore të lajmeve pjesa më e madhe e turistëve kanë qenë të moshës 40 deri 50 vjeçare. Në bord ka qenë edhe një fëmijë gjashtëvjeçar.

Anija për lundrimin e turistëve, 27 metra e gjatë, mban 60 pasagjerë dhe ishte e firmës hungareze Panorama Deck.

Lumi Danub rrjedh në mes të Budapestit dhe e ndan dy pjesët Buda dhe Pest. Lundrimet me anije në pjesën e Danubit që kalon në Budapest, janë shumë të preferuara nga turistët, sepse gjatë lundrimit shihen pikat turistike si Kalaja e Budës dhe ndërtesa e parlamentit. Në orët e pas perëndimit të diellit arkitektura e ndriçuar me madhështi tërheq shumë vizitorë. Kohët e fundit lundrimi në mbrëmje mbi Danub është shtuar shumë.

---