Mbi 1.300 persona u arrestuan gjatë protestave të zhvilluara të shtunën në Francë, ndërsa autoritetet raportuan dhjetëra raste zjarrvënieje, dëme materiale dhe përplasje mes demonstruesve dhe forcave të rendit.
Sipas raportit paraprak të Ministrisë së Brendshme franceze, gjithsej 1.314 persona u arrestuan më 24 tetor. Në protestat e 17 tetorit, numri i arrestimeve kishte arritur në 2.628.
Ministria bëri të ditur se 53 pjesëtarë të forcave të sigurisë u lënduan, krahasuar me 1.144 një javë më parë. Gjithashtu, u regjistruan 75 ndërhyrje të lidhura me zjarret, ndërsa 24 biznese u plaçkitën.
“Janë hapur disa hetime”, njoftoi Ministria e Brendshme në një komunikatë të publikuar të dielën, pa dhënë detaje të mëtejshme për rastet apo numrin e demonstruesve të lënduar.
Sipas autoriteteve, nata pas protestave kaloi e qetë. Demonstratat u organizuan në mbrojtje të fuqisë blerëse dhe shërbimeve publike. Sipas burimeve të ndryshme, në to morën pjesë nga 410.000 deri në 800.000 persona në mbarë Francën.
Autoritetet: Masat e sigurisë parandaluan incidente të shumta
Ministria e Brendshme vlerësoi se planifikimi paraprak dhe vendosja strategjike e forcave të rendit, si dhe aftësia e tyre për të lëvizur shpejt, ndihmuan në parandalimin e shumë incidenteve që synonin njerëzit ose pronën.
Të shtunën në mbrëmje, ministri i Brendshëm, Laurent Nuñez, deklaroi se marshimet në Francë kishin kaluar mirë. Megjithatë, sipas ministrisë, në disa qytete grupe të konsideruara me rrezik, përfshirë aktivistë të së majtës radikale, arritën të pozicionoheshin në pjesën e përparme, brenda ose në skajet e shumicës së marshimeve, duke shkaktuar përplasje.
Incidente u raportuan në disa qytete, përfshirë Parisin, Marsejën, Bordo-n, Tuluzën dhe Turin. Forcat e rendit përdorën gaz lotsjellës për të shpërndarë turmat dhe për t’iu përgjigjur përplasjeve.
Në Paris u arrestuan 142 persona
Në kryeqytetin francez, 142 persona u arrestuan, ndërsa 126 prej tyre u dërguan në paraburgim, bëri të ditur të dielën zëdhënësja e prefekturës së policisë, Hélène Denéchère.
Në një intervistë për radion France Inter, ajo tha se protesta e së shtunës u zhvillua me një numër demonstruesish të përafërt me atë të javës së kaluar, por në kushte krejtësisht të ndryshme të sigurisë.
Sipas saj, masat e ndërmarra ishin hartuar posaçërisht për të mbrojtur sa më shumë bizneset.
Denéchère deklaroi se marshimi dhe shpërndarja e demonstruesve në Paris kaluan pa probleme të mëdha. Megjithatë, ajo tha se rreth 500 persona që ndodheshin në pjesën e pasme të marshimit tentuan të sulmonin policinë dhe të dëmtonin pronën në afërsi të itinerarit të protestës.
Një javë më parë, protesta kundër kostos së lartë të jetesës në Paris ishte shoqëruar me kaos, marshime të paautorizuara dhe dëme në 450 biznese gjatë fundjavës, prej të cilave 228 ishin plaçkitur, sipas të dhënave të zyrës së kryetarit të bashkisë.
Zëdhënësja e prefekturës së policisë pranoi se autoritetet kishin nënvlerësuar numrin dhe dhunën e personave që kishin dalë për të shkaktuar përplasje.
Për të garantuar sigurinë gjatë protestave të së shtunës, në mbarë Francën u angazhuan 70.000 policë dhe xhandarë, rreth 20 për qind më shumë se më 17 tetor.
Ministria e Brendshme theksoi se bilanci i incidenteve mbetet paraprak dhe se hetimet për rastet e regjistruara janë në zhvillim e sipër/albinfo.ch/
