Konferenca “Gjuha amtare, dygjuhësia dhe integrimi” në Malmo

Në Qendrën Kulturore të Kosovës në Malmo të Suedisë ka filluar konferenca “Gjuha amtare, dygjuhësia dhe integrimi”, e organizuar nga Ministria e Diasporës dhe Investimeve Strategjike.

Kjo konferencë po mbahet në bashkëpunim me lidhjen e shoqatave shqiptare “Iliria” në Suedi, MASHT-in, Lidhjen e Arsimtarëve Shqiptarë “Naim Frashëri” në Suedi, qëllimi i së cilës është mbajtja gjallë e frymës edukuese të mësuesve të gjuhës amtare, rritja e dijes për mësimdhënien dhe relacionin ndërmjet nxënësit-prindit-mësuesit, si dhe mes gjuhës shqipe-suedeze, transmeton albinfo.ch.

Po ashtu ka për qëllim marrjen e përvojave më të mira nga mësimdhënia e mësimnxënia në Suedi, Gjermani, Finlandë, Greqi, Kosovë, Shqipëri e Austri.

Në këtë konferencë po marrin pjesë ekspertë, pedagogë, profesorë, mësues të gjuhës amtare nga diaspora, autorë librash, gjuhëtarë e letrarë, si: prof. Elena Kocaqi, ligjëruese në Universitetin e Durrësit, prof. Emin Kabashi nga Instituti Albanologjik i Kosovës, Nuhi Gashi nga MASHT-i, Anders Sörensson, shef sektori në Malmö, etj.

Konferenca për gjuhën amtare, dygjuhësinë dhe integrimin do të zgjasë dy ditë.