Fillon panairi ndërkombëtar i aviacionit

Me akrobacionet e avionëve dhe helikopterëve ushtarakë, ka filluar Panairi Ndërkombëtar i Aviacionit dhe Mbrojtjes në Australi, “Avalon Airshow”.

Ky është një nga panairet më të rëndësishme të aviacionit, i cili tërheq vëmendjen e mijëra vizitorëve. Panairi në qytetin australian Geelong, i cili mbahet çdo dy vjet, zgjat tri ditë, ndërsa marrin pjesë vende dhe kompani që kryesojnë në fushën e aviacionit.

Në pjesën e mbyllur të panairit, i cili vizitohet nga dhjetëra mijëra njerëz, kompanitë kryesore në industrinë e avionëve promovojnë prototipet dhe teknologjitë e reja. Aty prezantohen fluturaket pa pilot, raketa-hedhësit, motorët e helikopterëve, avionët luftarakë, tekonologjitë hapësinore si dhe sistemet radare të dronëve.

Në pjesën e hapur të panairit janë ekspozuar të gjitha elementet nga avionët e pasagjerëve deri te avionët dhe helikopterët luftarakë, pastaj avionët transportues gjigant, autoblindat ushtarake si dhe avionët akrobatikë dhe helikopterët civilë.

Në kuadër të panairit, avionët dhe helikopterët luftarakë të Australisë, Zelandës së Re, Singaporit, SHBA-së, si dhe avionët transportues gjigant shfaqën aftësitë e tyre.