Në dhjetor pritet të nisë procesi i transformimit të FSK-së

Forca e Sigurisë së Kosovës shënon ditën e saj. Të 7 kazermat e FSK-së kanë hapur dyert për qytetarët, të cilët kanë parë nga afër  pajisjet dhe gjithë ato që e bëjnë Forcën e Sigurisë së Kosovës.

Ministri i FSK-së, Rrustem Berisha, ka theksuar se në dhjetor pritet të nisë procesi i transformimit të FSK-së, e që sipas tij, do të zgjasë 10 vjet, përcjell albinfo.ch.

Komandanti i Forcave Tokësore, Enver Cikaqi, u shpreh se FSK-ja ka bashkëpunim të mirë me të gjithë qytetarët e Kosovës, teksa shtoi se një gjë e tillë do të vazhdojë edhe në të ardhmen. Tri projektligjet që i japin mandat ushtarak Forcës tashmë janë në lexim të dytë dhe pritet të votohen në javët e para të dhjetorit, nga ku do të fillojë transformimi 10-vjeçar i krijimit të Ushtrisë së Kosovës.

Dita e Forcës tash e një kohë mbahet më 27 nëntor, dhe ajo lidhet me betejën e parë të UÇK-së, mes datave 25-27 nëntor të ‘97-s dhe daljen e parë publike të UÇK-së, më 28 nëntor të po atij viti.