Radoiçiq deklarohet nga arratia: Nuk do të dorëzohem

Nënkryetari i Listës Serbe, Milan Radoiçiq, është deklaruar nga arratia.

I njëjti që nga dita e premtë po kërkohet nga policia nën dyshimet se ka qenë i përfshirë në vrasjen e politikanit serb në Kosovë, Oliver Ivanoviq, shkruan Albinfo.ch. 

Ai ka shkruar se njësitet speciale të Policisë së Kosovës deshën “ta vrasin” të premten në mëngjes kur tentuan ta arrestojnë bashkë me katër të dyshuarit tjerë në Mitrovicën e Veriut.

“Nuk kam qenë shoku më i afërt i Ivanoviqit por nuk jam vrasës dhe nuk kam asnjë lidhje me vrasjen e tij”, ka shkruar Radoiçiq. 

Sipas tij, policia tregoi forcë të premtën ndaj serbve.

“Aksioni i fundit kriminal i Policisë dhe i pjesëtarëve të sigurimit privat famëkeq të terroristëve shqiptarë në Mitrovicë të Veriut ishte demonstrim i forcës ndaj çdo serbi që ka vendosur ta mbrojë dinjitetin dhe të drejtën e vet për jetë”, tha Radoiçiq.

Ai tregoi se policia i shkuan në banesën ku jeton ke gruan dhe fëmijët. 

“Erdhën tek unë në banesë ku jetoj me gruan dhe fëmijët, të armatosur deri në dhëmbë, me të vetmin qëllim, që të më vrasin. Dhe për këtë kam dëshmi të qarta”, ka shkruar tutje ai.

Në fund të letrës ai ka thënë se nuk do të dorëzohet.