Ndërrimi i ministrit i kushton familjes rome me dëbim në Kosovë

Policia ka shkuar në banesën e familjes rome nga Kosova në orën 3.30 të mëngjesit dhe u ka dhënë vetëm një orë e gjysmë për t`i mbledhur plaçkat

Ndërrimi i qeverisë në landin gjerman Niederachsen (Saksonia e ulët) ka sjellë edhe ndryshimin e qëndrimit për dëbimin e azilkërkuesve  nga ky land. Kështu, të shtunën është bërë dëbimi i kontestuar i radhës, në Kosovë i një familjeje rome.

Pasi që është dëbuar familja (nëna me dy djem të mitur), ministri i ri i brendshëm Boris Pistorius që vjen nga partia SPD, ka deklaruar të martën se nuk e ka ditur që në rastin konkret bëhet fjalë për një familje.  

“Dëbimi ka qenë tashmë i planifikuar, para se Pistorius të merrte postin e ministrit, dhe atij i është dhënë vetëm një informacion i përgjithshëm në lidhje me rastin” ka thënë një zëdhënëse e qeverisë.

Kështu, ministri do ta rishqyrtojë edhe një herë më hollësisht rastin dhe pastaj do të vendosë nëse do ta ndryshojë vendimin për dëbim ose jo.

Nga ana tjetër, partia rivale CDU akuzon Pistorius-in se kështu ai po i shkel premtimet e drena elektorale.

Rastit të dëbimit të familjes rome kosovare i është dhënë publicitet i madh në mediet gjermane. Policia ka shkuar në banesën e familjes në orën 3.30 të mëngjesit dhe u ka dhënë vetëm një orë e gjysmë për t`i mbledhur plaçkat. Organizatat për mbrojtjen e refugjatëve kanë reaguar duke e quajtur këtë aksion brutal dhe johuman.