Punëtorët e Postës në grevë

Etrit Hoti është shprehur se, greva nuk do të ndërpritet deri në ekzekutimin e pagave për punëtorët

Punëtorët e Postës së Kosovës që nga sot kanë hyrë në grevë të përgjithshme për shkak të mos marrjes së pagave të tyre për muajin shtator.

Për këtë ata po paralajmërojnë edhe protesta në rrugë. Në grevë kanë hyrë të gjitha degët e Postës së Kosovës në shtatë regjione të vendit.

Kryetari i Sindikatës së Punëtorëve të Postës së Kosovës, Etrit Hoti është shprehur se, greva nuk do të ndërpritet deri në ekzekutimin e pagave për punëtorët. Sipas tij këta punëtorë kërkojnë edhe një garanci se më nuk do kenë vonesa të marrjes së pagave.

“Punëtorët e Postës së Kosovës, kolegët e mi deri sot më datën 10 nuk u janë realizuar apo ekzekutuar pagat e Postës së Kosovës. Organizimi i grevës bëhet me qëllimin final realizimin e pagave…një garancion që nuk do të përsëritet të njëjta seriale për çdo muaj për punëtorët e Postës së Kosovës që do të thotë realizimi i shërbimit të subvencionimit universal postar që do të thotë marrja e shërbimeve shtetërore publike”, tha Hoti, raporton “KosovaPress”.

Hoti po ashtu ka deklaruar se nëse kërkesat e tyre nuk plotësohen ata do të vazhdojnë të kërkojnë plotësimin e tyre përmes protestave, përcjell albinfo.ch.

Sipas tij, Qeveria e Kosovës nuk ka reflektuar lidhur me kërkesën e tyre për shërbimin universal postar, ndonëse një premtim i tillë e kishte marr kohë më parë nga ministri i Zhvillimit Ekonomik, Valdrin Lluka.

Njëra nga punëtoret e Postës, Albulena Paçarada, është e shqetësuar për mos marrjen e pagës së saj duke thënë se kjo po ndikon negativisht tek familjet e tyre.

Ajo shton se për shkak të mos plotësimit të kërkesave të tyre nga Qeveria, po detyrohen që shërbimet e tyre ndaj konsumatorëve t’i ndërpresin.

Punëtorët e Postës së Kosovës kanë mbajtur grevë edhe gjatë muajit korrik të këtij viti për shkak të mos marrjes së pagës së tyre, dhe mos plotësimit të kërkesave të tyre.

---