Apeli lë në fuqi masën e paraburgimit për të arrestuarit në lagjen Kalabria 

Ende në paraburgim të arrestuarit në Lagjen Kalabria.

Gjykata e Apelit ka lënë në fuqi masën e paraburgimit prej një muaj për  katër të arrestuarit, tre prej të cilëve shtetas të huaj dhe një femër kosovare.

Apeli i refuzoi ankesat e avokatëve mbrojtës si të pabazuara, duke lënë në fuqi vendimin e datës 20 korrik të Gjykatës Themelore të Prishtinës. Të arrestuarit, Mario Millosheviq, Gjorgje Paviqeviq, Strahinja Dankoviq dhe Laureta Zyba.

Shtetasit e huaj, ishin të kërkuar me fletarrest ndërkombëtar, derisa në Kosovë, ata dyshohen për posedim të armëve dhe posedim të substancave narkotike.

Derisa për shtetasen kosovare Laureta Zyba, dyshimet e prokurorisë janë se është e përfshirë në veprën penale “Falsifikim i parasë në bashkëkryerje”. Aksioni për arrestimin e tyre është realizuar në datën 18 të muajit të kaluar, në lagjen Kalabria të Prishtinës.