Xhamitë kanë hapur dyert për vizitorët

Mbi 100 mijë vizitorë kanë frekuentuar të mërkuren nëpër xhamitë në Gjermani, në ditën e organizuar me dyer të hapura

Rreth 670 xhami në mbarë Gjermaninë kishin hapur dyert të mërkurën me moton “Arti dhe Kultura Islame”.  Me ligjerata dhe ekspozita, organizatorët kanë theksuar kontributin kulturor të Islamit dhe në këtë mënyrë kanë synuar të përhapin një imazh më pozitiv për myslimanët në Gjermani.

“Me ndërtimin e xhamive myslimanët kanë treguar se ata janë bërë pjesë e shoqërisë gjermane”, tha Ali Kizilkayan, kryetar i  Këshillit Islam në Këln të Gjermanisë.

Megjithatë “Dita e xhamive të hapura” ka kaluar nën hijen e debateve mbi ndalimin e synetisë në Gjermani dhe videos fyese ndaj Profetit Muhamed. Duke folur për trazirat në shumë vende kundër videos, kryetari i Këshillit Islam theksoi se dhuna nuk është as islame e as njerëzore. Ai sqaroi njëkohësisht se myslimanët e ndjejnë veten të ofenduar nga ky film.

Që nga viti 1997, shoqatat myslimane gjithmonë në ditën e ribashkimit të Gjermanisë ftojnë publikun e gjerë që të vizitojnë xhamitë e tyre. Në këtë mënyrë ata duan të shprehin lidhjet e tyre me Gjermaninë.

Sipas një studimi të fundit në Gjermani jetojnë deri në 4.3 milionë myslimanë.