Çdo i treti zviceran gjithë kohën online!

Dy të tretat e të rinjve kanë gjithmonë pranë vetes një laptop, tablet-Pc ose smartphone në gjendje gatishmërie

2.2 milionë qytetarë të Zvicrës ose afër 30 për qind e tërë popullatës qëndrojnë praktikisht gjithë kohën online. Kjo nënkupton që ata janë të lidhur me ndonjërin nga mjetet teknike që e mundësojnë këtë luihje, edhe kur janë në tren, në restorant, në fushë etj.

Këtë rezultat e ka nxjerrë një studim i publikuar të martën mbi shfrytëzimin e internetit, i realizuar nga firma Net-Metrix. Sipas këtij studimi, vetëm nga viti i kaluar është shtuar për 36 për qind numri i atyre që me internet janë të lidhur jo vetëm në vendin e punës dhe në shtëpi por edhe jashtë tyre.

Në këtë drejtim është veçanërisht e madhe përqindja e të rinjve nën moshën 30 vjeçare. Rreth dy të tretat e tyre kanë gjithmonë pranë vetes një laptop, tablet-Pc ose smartphone në gjendje gatishmërie.