Zbulohet thërmija që shpjegon krijimin e botës?

Në Qendrën Evropiane për hulumtime Bërthamore Cern në Gjenevë shkencëtarët kanë arritur të zbulojnë një thërmi të re elementare. Hulumtimet e gjera dhe të thella që bëhen prej vitesh në këtë qendër, kohë më parë ishte thënë se kishin dështuar të gjenin “pjesëzën” famoze ku mund të “lexohet” krijimi i botës.

Sipas njoftimeve që vijnë nga Cern bëhet fjalë për zbulimin e elementit të ashtuquajtur “Higgs-Boson”, që ka marrë emrin sipas fizikanit britanik Higgs.

Fizikanët prej dyzet vitesh janë në kërkim të këtij elementi, të cilin ndryshe e kanë quajtur “pjesëz të zotit”. Ndonëse flitet për një rezultat ende në zhvillim dhe jo përfundimtar, ky zbulim është një hap shumë i madh dhe bindës në drejtimin e duhur, ka thënë për mediet udhëheqësi i ekipit të hulumtuesve që kanë marrë pjesë në këtë projekt.

Teoria e Higgs-it  thotë se të gjitha objektet kanë masën e tyre, mirëpo deri me këtë zbulim mungonte dëshmia që do ta mbështeste këtë teori.