Zvicra dhe Gjermania zgjidhin konfliktin e “zhurmës së aeroplanëve”

Një konflikt që është duke ngarkuar prej shumë vitesh marrëdhëniet në mes të Zvicrës dhe Gjermanisë, duket se ka gjetur zgjidhjen

“Zhurma e aeroplanëve” nënkupton problemin që krijohet në Zvicrën lindore dhe në Gjermaninë jugperëndimore nga zhurma që lirojnë aeroplanët gjatë ngritjes dhe aterrimit në Aeroportin e Cyrihut në Kloten.

Zona që preket nga këto veprime përfshin këto regjione të dy vendeve dhe për këtë arsye, si Gjermania, ashtu dhe Zvicra kishin ankesat e tyre.

Por të hënën, ministrja e komunikacionit, Doris Leuthard ka kumtuar në një konferencë shtypi se dy vendet kanë arritur pajtimin për zgjidhjen e problemit. Kompromisi parasheh që të gjithë aeroplanët duke filluar nga ora 18 deri në orën 6.30 të mund të aterrojnë duke shfrytëzuar vetëm territorin e Zvicrës.

Nga ana tjetër, Gjermania heq dorë nga kufizimi i numrit të fluturimeve. Kështu në mëngjes, aeroplanët e aeroportit të Cyrihut mund të fluturojnë mbi territorin gjerman një gjysmë ore më herët.

Krahas kësaj Aeroporti i Cyrihut detyrohet të zgjasë pistat. Po kështu, për këtë kompromis duhet të votojnë edhe parlamentet e të dy vendeve.

Qysh tash kanë filluar, nga palë të ndryshme kontestimet e kësaj marrëveshjeje.