Papa Françesku viziton Zvicrën më 21 qershor

Presidenti i Konfederatës së Zvicrës, Alain Berset, së bashku me ministrat tjerë të vendit do ta presë Papa Françeskun më 21 qershor në Gjenevë

Kreu i Kishës Katolike, Papa Françesku do të vizitojë Zvicrën më 21 qershor të këtij viti. Lajmin për vizitën e tij, të publikuar më parë nga SDA, e ka konfirmuar edhe për radion  SRF Kancelaria Federale në Bernë.

“Këshilli Federal është i gëzuar që Papa e ka pranuar ftesën e bërë”, thuhet në konfirmimin e Kancelarisë Federale. Presidenti i Konfederatës së Zvicrës, Alain Berset, së bashku me ministrat tjerë të vendit do ta presë Papën më 21 qershor në Gjenevë, transmeton albinfo.ch. Ata do të jenë aty si pjesë e një bashkëbisedimi zyrtar, thuhet më tutje në përgjigjen e Kancelarisë. Modalitetet tjera të vizitës së Papës në Zvicër janë ende në përpunim e sipër.

Vizita e fundit që një Papë ka bërë në Zvicër ka qenë ajo e Papa Gjon Palit të Dytë. Ai kishte qenë në Zvicër, në Bernë në vitin 2004.