Pierre Maudet triumfon në Gjenevë

Pierre Maudet kalon nga ekzekutivi i qytetit në Këshillin e Shtetit

Këshilltari administrativ i qytetit të Gjenevës, Pierre Maudet, 34-vjeçar, u zgjodh të dielën në Këshillin e Shtetit në Gjenevë me 39.8 për qind të votave. Kryetari i mëparshëm i Gjenevës (PLR) arriti përpara socialistes Anne Emery-Torracinta (28.3% ) dhe Eric Stauffer (MCG me 27.6%).

Pierre Maudet arriti në qendër të qytetit nën brohoritjet e mbështetësve të tij. “Unë kam mbetur pa frymë kur mësova rezultatin që kam arritur”, ka thënë ai për televizionin lokal “Léman Bleu”. Ndërkaq, Pierre Maudet tha se suksesi i tij ka qenë i mundur falë “fushatës në terren”.

Zgjedhja e Pierre Maudet i mundëson të djathtës të ruajë shumicën e saj në ekzekutivin e kantonit të Gjenevës. Liberal-radikali pason z. Mark Muller, një tjetër PLR-ist, i cili u detyrua të japë dorëheqjen në fillim të këtij viti pas një grindjeje me një shërbyes të një klubi nate. Pierre Maudet do të marrë zyrtarisht funksionin më 29 qershor.