Për të shpëtuar të bijën, u dorëzon pengmarrësve 30 milionë frangat që i transportonte

Policia ndërkohë ka vërtetuar se transportuesi i të hollave është plaçkitur në tërësi por nuk e jep shumën e të hollave që ka qenë aty. Ndërsa mediet franceze flasin për një shumë në mes 20 dhe 30 milionë frangash

KEYSTONE

Një shtetas francez i cili punonte si shofer i një makine për transportim të parave për një firmë zvicerane ndërsa banonte në Annemasse të Francës (në kufi me Zvicrën) është sulmuar nga tre persona të maskuar, me ç`rast i është grabitur e gjithë shuma e të hollave që ai po e transportonte.

Por ajo që i paraprin këtij sulmi është se francezit në fjalë i ishte rrëmbyer e bija në Francë dhe rrëmbyesit e kishin mbajtur atë peng duke e kushtëzuar me dorëzimin e parave, njofton policia e Kantonit Vaud.

Ende shumë hollësi rreth këtij sulmi ose rrëmbimi dhe pengmbajtjeje mbeten të paqarta, shkruajnë mediet franceze dhe ato zvicerane.

Policia ndërkohë ka vërtetuar se transportuesi i të hollave është plaçkitur në tërësi por nuk e jep shumën e të hollave që ka qenë aty, transmeton albinfo.ch. Ndërsa mediet franceze flasin për një shumë në mes 20 dhe 30 milionë frangash.

Askush nuk ka pësuar lëndime, si gjatë pengmarrjes ashtu edhe gjatë sulmit. E bija e transportuesit të parave është gjetur e shokuar, natën e të enjtes buzë rrugës në komunën Tramoyes në lindje të Lionit. Ajo u ka deklaruar policëve se është rrëmbyer në konviktin e studentëve nga dy burra të cilët janë prezantuar si punëtorë të usjësjellësit.