Martesa me detyrim, delikt që dënohet me burg!

Me nenin e ri në Ligjin Penal parashieht që dënimi për martesë të detyruar të jetë nga tre deri në pesë vjet heqje lirie

Dhoma e kantoneve e Parlamentit të Zvicrës ka miratuar sot me të gjitha votat pro, përshtatjet në gjashtë ligje që në ndonjë mënyrë lidhen me martesat e detyruara.

E përbashkëta e këtyre ndryshimeve është se martesat me detyrim nuk do të tolerohen më. Një vendim të ngjashëm po ashtu me shumicë të madhe votash e pati marrë më parë edhe Dhoma Nacionale e parlamentit.

Të dy dhomat janë të pajtimit që në këtë pikë të ashpërsohet Ligji Penal: cilido që e detyron dikë për martesë duhet të ndëshkohet.

Me nenin e ri në Ligjin Penal do të ndëshkohet secili që me dhunë ose kërcënim detyron dikë që të hyjë në lidhje martesore. Veç kësaj martesa me detyrim me të renë do të konsiderohet delikt që do të ndiqet për nga detyra zyrtare (Ex oficio).

Dënimi për një delikt të tillë do të jetë nga tre deri në pesë vjet heqje lirie.